|
|
|
|
|
 |
|
|
|
Dau bist dahoam
wau ma redt
wäi ma denkt -
dahoam bist dau net
wau ma redt
nauchn Mail.
Margret Hölle
I mächt wieda a kloana Bua sa -
In da Freih aafsteh und bloß denga:
Wos spiel i heind?
Mit'm kaputtn Blastik-Bulldogga
Sand und Stoana foan.
Mittooch d'Suppn ausessn meißn,
Daß's morgn wieda schee wead.
Im Obstgoatn Baam greigln
Und wecha da zrissna Hosn Orschbriegl greign.
Aaf d'Nacht "Jesulein klein" bättn.
Und dann - stermsmeid,
Owa a kloans bissl z'frien - eischloffa.
Kon ja sa, daß's ma damals
schlechta ganga is wei heind.
Owa vastandn how i's no net a so.
Albert Vetter
Äiamal moin i,
wöi glückli i bi.
Äiamal woin i,
ganz stad für mi hi.
Äiamal frißt maa
d'Angst alles o.
Äiamal bin i
da allabest Mensch,
äiamal spinn i,
vor Wout, daß i flensch.
Äiamal sog i,
mächd lebn hundat Joa.
Oba oimal, da trogns mit
furt af da Boa.
Fritz Morgenschweis
D Augn zua is no lang net gschlofa!
Eibrockt is no lang net ausglöffelt!
Je kleana s Mandl, desto größer werdn d Schritt!
Wird scho a so sei müassen, sunst waars net a so!
Mit da Zeit blüahn d Hackstöck!
Zwischa Tog und Nacht is koa Zaun!
A neia Besn kehrt guat, aber an alter kennt a jeds Winkerl!
S Glück legt oanm schnell an Strouhsack vor d Haustür!
A großer Schneehaufa zgeht aa!
So schäine Dooch san des äitz,
daß mas goua niad glaam ko.
Da foabiche Wold, niad satt schaua ka ma se.
Und da Himme so lüicht, koa Wöilkerl drin.
So schäi is rundummadum, daßd fast a wengarl draure wiast, grod waals so schäi is ...
Georg Gick
"da schnei is von doch oara grutscht"
von doch oda vo da nacht?
"von doch!"
von doch vodaima a geld
und vo da nacht vadaimas wida
Überliefertes
Hinta meim Vodan sein Stodl, Stodl, rinnt da Dreeg viera wai Odl, Odl, hinta meim Vodan sein Haus, Haus, kennt se koa Deife mehr aus.
- Aitz howe mei Haisl in Wold assebaut, hollaradiriadei, diriadei, in Wold assebaut.
- Dau hom ma dai Krouan zum Fenster neigschaut, hollaradiriadei, diriadei, zum Fenster neigschaut.
- Aitz howe mei Heisl mit Hovastraoh deckt, hollaradiriadei, diriadei, mit Hovastraoh deckt.
- Aitz homa dia Krouan de Kerndln rauspickt, hollaradiriadei, diriadei, die Kerndln rauspickt.
- Aitz howe mei Heisl mit Schnupfdabok deckt, hollaradiriadei, diriadei, mit Schnupfdabok deckt.
- Aitz homa dia Krouan den Schnupfdabok weg, hollaradiriadei, diriadei, den Schnupfdabok weg.
- Aitz howe mei Heisl mit Breda vaschlogn, hollaradiriadei, diriadei, mit Breda vaschlogn.
- Aitz homa dia Krouan die Negl rauszogn, hollaradiriadei, diriadei, dai Negl rauszogn.
- Nau woats ner ihr Krouan, eich wire scho kriagn, hollaradiriadei, diriadei, eich wire scho kriagn.
- Nau schneid e eich d'Flüagl o, dann kinnts nimma fliagn, hollaradiriadei, diriadei, nau kinnts nimma fliagn.
- Und wenn e mal heira, dann heire glei drei, hollaradiriadei, diriadei, dann heire glei drei.
- Zwoa spiere in Saustoll, die dritt wird mei Wei, hollaradiriadei, diriadei, die dritt wird mei Wei.
- Aitz howe halt gheirat, wos howe davo, hollaradiriadei, diriadei, wos howe davo.
- A Stubn volla Kinna, a Wei wao nix ko, hollaradiriadei, diriadei, a Wei wao nix ko.
- Ja, wennst moanst du kannst singa, du Depp du graina, lao ander Leit singa, dais bessa kinna.
- Ja, da Sepp (Name des Angesprochenen) der hod gschlaofa, vom Gockl af da Strah, da Gockl hod an Sepp aagschissn, und da Sepp en Gockl aa.
- Ja, wennst moanst du kannst me dratzn, du Schaofhammelhaxn, du hinkate Goaß, gei leck me am Oasch.
- Dau hot oana gsunga, des hot se net greimt, dem gherat sei Zunga am Oasch hinte gleimt.
- Dau hot oana gsunga, der ka ma niat aa, der hängt halt vom (Name) an da Hundsstanga dra.
- Dau hot oana gsunga, der singt ma aas z'Fleiß, gei hoam, lao de kampln, di beißn ja d'Leis.
- Dau drobn aafn Bergl, dau raffa a poa Taabn, dau kummt halt da (Name) zum Fedan zamglabn.
- Haoch drobn aafn Kirwabaam, dau is mei Nest, wennst a mei Schatz net bist, denna bist as gwest.
- Dau hot oana gsunga, der singt halt aas Naot, wenn a am Samsta net bedlt, hod a am Sunnta koa Braot.
- Is scho glei 3 vorbei, homma nu koa Hei niat gheigt, homma nu koa Schwewaln gmacht, is s scho glei Nacht.
- Im Holz drass is's kolt drass, steit a Fuchs im Feia, für me und für di is koane gwachsn heia.
- Gestan howe gackert im Krautacker drin, aitz is ma da Handochs in Baam affegstiegn.
- Zwischa zwoa Berg und Dol singa zwoa Nachtigol, zwischa zwoa Moadln drin, dau is guat liegn.
- Lustig is‘s Burschenlebn, s‘Geld hot uns d‘Muata gebn, s‘Diarndl homma selber gschafft, gestern aaf d‘Nacht.
- As Diarndl hob is drei viermal gfragt, wo‘s ihr treus Herzerl hat, sie hot se buckt und gneigt, und hot ma‘s zeigt.
- Da Bauer hot d‘Bäurin zwickt, hinta da Bodnstiagn hint, denkt se da Knecht, sagradi, morng zwicka di i.
- Ja, wenns Wirtshaus a Kircha waa, und d'Kellnerin da Altao, dann mecht i a Pfoara sei, sechsadreisg Joa.
- As Wirtshaus is eckard und Kellnere is rund, und da Wirt hot a Glatzn, der zaudirre Hund.
- Aaf Raachering bin e ganga, woa da Weg so koude, schaine Moidln haits gebn, owa latta roude.
- Aaf Raachering bin e ganga, woa da Weg so stoane, schaine Moidln haits gebn, owa latta kloane.
- Aaf Raachering bin e ganga, woa da Weg so ramperd, schaine Moidln haits gebn, owa latta wampard.
- Musikanten ihr Schwanz, spilts aaf eire Tanz, ja ihr dad ses scho spiln, owa wenntses ner kannts.
Pfingstlümmel ogstorbn, bist heit nacht im Bett dafrorn,
waast eia aafgstandn waast aa nimma worn.
Da Bauer hot drei Knecht,
da erste hoast Mistkraal,
geit in Stoll und putzt sein Gaal,
da zwoate hoast Langsam,
geit in Stodl und kiats Gsoh zsamm.
Da dritte hoast Kochlöffelstül,
wou a hikummt, frißt a und safft a recht vül.
Gebts ma ner koa raode Kaoh, denn i ho koan Stoi dazao.
Liaba a poa Moaß Schmolz nd a poa Schilling Oia.
Im Namen des Fuchses und des Hoses
da Bauer mit seiner langan Boartnosn.
(überliefert von Georg Schwab)
Foat da Pfingstlümmel ums Haus, schaut da Bauer und Bäuere zum Fenster raus.
Da Bauer hot drei Knecht im Stall,
da erste hoast Mistkraal,
geit in Stoll und putzt sein Gaal,
da zwoate hoast Pater Langsam,
geit in Stodl und kiats Gsoh zsamm.
Da dritte hoast Kochlöffelstül,
wou a hikummt, frißt a und safft a recht vül.
Bäuere, Bäuere, gib ma ja koa schwoaze Kaoh, denn i ho koan Stoi dazao.
Liaba a poa Schock Oia.
Oans und zwoa is a niat viel, fünf und sechs is a anders Gspiel.
Im Namen des Fuchses, im Namen des Hoses
da Bauer mit da langan Goasnosn.
(überliefert von Betty Moser)
|
|
|
| |
|
|
|
|
|
|
|
|
|
|
